ဟိုးအရင် ရန်ကုန်တက္ကသိုလ်မဂ္ဂဇင်း မျက်နှာဖုံးတွေမှာ ပန်းချီလှလှလေးတွေ မှီလိုက်သူတွေကတော့ မြင်ဖူးကြမှာပါ။ အဲဒီပန်းချီလေးတွေဟာ သာမန်ကြည့်ရင် သစ်ပင်၊ ပန်းပင်၊ ကျောင်းသူ၊ ကျောင်းသားတွေရဲ့ ပုံတွေပါပဲ။ အဲ… မှန်တစ်ချပ်ကို ယူလို့ တိတ်ဆိတ်တဲ့ အခန်းတစ်ခုထဲမှာ တစ်ကိုယ်တည်း ထိုင်လို့ မဂ္ဂဇင်းမျက်နှာဖုံးက ပန်းချီတွေကို မှန်ထောင်ကြည့်မိမယ်ဆိုရင်…

သာယာလှပမှု၊ သာမန်ပန်းချီတွေပျောက်ကွယ်လို့ အနိဌာရုံ တွေကို မြင်ကြရပါလိမ့်မယ်။ ဒါတောင်မှ ပန်းချီတွေဟာ ခံစားတတ်သူပေါ်မှာ မူတည်လို့ ပုံစံပြောင်းတတ်ကြပါသေးတယ်။ (ဆက်ဖတ်ရန်…)

သူငယ်ချင်းတစ်ယောက်က ဓာတ်ပုံလေး တစ်ပုံ ပို့လာတယ်။ အဲဒီပုံလေးကို မြင်ပြီး ငယ်ငယ်က ဖတ်ဖူးတဲ့ ရင်ထဲစွဲနေတဲ့ ပုံပြင်လေး တစ်ပုဒ်ကို သွားသတိရလိုက်မိတယ်။

တစ်ခါက တိုင်းပြည်တစ်ခုမှာ နန်းရှင်ဘုရင်ကြီးတစ်ပါးရဲ့ သမီးတော် တစ်ပါးရှိသတဲ့။ အဲဒီသမီးတော်လေးကို မိထွေးတော်က မုန်းမုန်းနဲ့ တောထဲက ရဲတိုက်တစ်ခုထဲမှာ လှောင်ပိတ်ထားတာပေါ့။ ရဲတိုက်တံခါးကိုလဲ ကျိန်စာတွေနဲ့ ပိတ်ထားတယ်တဲ့။ ဘယ်သူမှ ဖွင့်မရအောင်လို့။ ရဲတိုက်နားကို ကြိုးတွေဘာတွေနဲ့ တက်မရအောင်လဲ အမျိုးမျိုး ကာရံထားတယ်။ သမီးတော်လေးက ရဲတိုက်ထဲမှာ ရက်ပေါင်းများစွာ၊ လပေါင်းများစွာ နေရတယ်။ အနီးအနားတိုင်းပြည်က မင်းသားတွေကလဲ သမီးတော်လေးကို ကယ်တင်ဖို့ ရထားလုံးနဲ့တစ်ခါ မြင်းနဲ့တဖုံ၊ ရောက်ရောက်လာကြပေမယ့် ရဲတိုက်တံခါးဝက ကျိန်စာကို ဖတ်ပြီး ပြန်ပြန်လှည့်သွားကြတယ်။

တစ်နေ့ကျတော့ အညတရ စောင်းသမားရှင်တစ်ယောက်က စောင်းပိုက်လို့ ရောက်လာတယ်။ မင်းသမီးလေးရှိရာ ရဲတိုက်ပြူတင်းပေါက်ကို မော့ကြည့်တယ်။ မင်းသမီးလေးကလဲ နုံနုံချာချာ စောင်းသမားရှင်ကို ငုံ့ကြည့်တယ်။ စောင်းသမားရှင်က ရဲတိုက်အောက်ခြေ တံခါးဝက စာကို ဖတ်ပြီး ထုံးစံအတိုင်း ခေါင်းငိုက်စိုက်ချ ထွက်သွားတာပေါ့။ အဲဒီအချိန်မှာ ခပ်လှမ်းလှမ်းမှာ မင်းသားတစ်ပါးက မြင်းဖြူကြီးစီးပြီး ရပ်ကြည့်နေတယ်။ သူလဲပဲ ကျိန်စာကို ဖတ်ပြီး ခေါင်းငိုက်စိုက်ချ ထွက်သွားတယ်။

ဒါပေမယ့် နောက်ရက်တွေမှာ မြင်းဖြူရှင်နဲ့ စောင်းသမားတို့က ထပ်ရောက်လာတယ်။ ရောက်လာပြီး အဲလိုပဲ ပြန်လှဲ့သွားတယ်။

တစ်နေ့တော့ ရဲတိုက်တံခါးကြီးက ပွင့်နေတယ်။ မင်းသမီးလေးက ရဲတိုက်လှေကားတွေပေါ်က ဖြည်းဖြည်းချင်း ဆင်းလာတယ်။ ခပ်လှမ်းလှမ်းမှာ မြင်းဖြူရှင်က မြင်းပေါ်ကစောင့်နေတယ်။ မင်းသမီးက မြင်းဖြူရှင်ဆီ လျှောက်သွားတယ်။ မြင်းဖြူရှင်က မင်းသမီးကို မြင်းပေါ်တင်ပြီး ထွက်ခွာသွားတယ်။

ရဲတိုက်ခြေရင်းမှာတော့ စောင်းသမားရှင်က လဲကျနေတယ်။ သူ ရီဝေနေတဲ့ မျက်လုံးတွေနဲ့ တဖြည်းဖြည်းဝေးသွားတဲ့ မြင်းပေါ်က မင်းသမီးလေးကို ကြည့်နေတယ်။

ရဲတိုက်တံခါးဝမှာ ရေးထားတဲ့ကျိန်စာကလေ…

မင်းသမီးလေးကို လွတ်မြောက်စေချင်ရင် တစ်ကယ်မေတ္တာစစ်နဲ့ ချစ်တယ်ဆိုရင်၊ ရဲတိုက်တံခါးကို ဖွင့်နိုင်တဲ့ တစ်ခုတည်းသော နည်းလမ်းကတော့ မိမိနှလုံးသွေးနဲ့ ရဲတိုက်တံခါးကို ပက်ဖျန်းပေးလိုက်ပါတဲ့။ အဲဒီတနည်းနဲ့ပဲ ကယ်တင်နိုင်မယ်လို့ ရေးထားတာပါ။

စောင်းသမားရှင်ဟာ မြေပြင်ပေါ်မှာ လဲကျနေရင်း၊ သူ့လက်ထဲက ဒါးကို ကျစ်ကျစ်ပါအောင် ဆုပ်ကိုင်ထားရင်း မင်းသမီးလေး လွတ်မြောက်သွားတာကို ကျေနပ်စွာငေးကြည့်နေခဲ့တယ်…….။ မင်းသမီးလေးကတော့ သူ့ကိုယ်ပေါ်ကိုတောင် ကျော်လွှားသွားတယ်လို့ မူရင်းစာရေးသူက ဇာတ်နာအောင် ရေးထားတာပေါ့ကွယ်။

ပုံပြင်လေးကတော့ အဲဒါပါပဲ။

ဒါပေမယ့်….

ဒီဓာတ်ပုံထဲက မင်းသမီးကတော့ မြေပုံလေးကို သံယောဇဉ် မပြတ်ပဲ စောင်းငဲ့ကြည့်နေခဲ့ပါတယ်။

လွမ်းတယ်မောင်……။
မောင် ထွက်ခွာသွားတဲ့လမ်းလေး
ခပ်ငေးငေးကြည့်ရင်း
အလွမ်းတွေနဲ့ အတိပါပဲ.. မောင်။

(ဆက်ဖတ်ရန်…)

ခပ်တိုးတိုး တိုက်ခတ်သွားတဲ့ ညလေပြေကြောင့်
ညမွှေးပန်းလေးတွေ ကြွေကျသွားတယ်။
လရောင်အောက်က တောင်ကုန်းမြင့်လေးပေါ်မှာ
အရွက်တွေဝေေ၀ဆာဆာနဲ့ သစ်ပင်အိုကြီးတစ်ပင်ရှိသတဲ့။

သစ်ပင်အိုကြီးရဲ့ အမြစ်တွေပေါ်မှာ ….
သွယ်လျှတဲ့ ပုံရိပ်လေးတစ်ခုဟာ
ကွေ့ ဝိုက်စီးဆင်းနေတဲ့..
စမ်းချောင်းလေးဘက်ကို မျှော်ငေးနေသတဲ့။
(ဆက်ဖတ်ရန်…)

ကိုလွမ်းလူ ကွန့်မင့် ရေးသွားတာ ကိုဖတ်ပြီး ငယ်ငယ်က အဖေပြောဖူးတာလေး သတိရသွားမိတယ်။

ဖေဖေငယ်စဉ် လူပျိုပေါက်အရွယ်တုန်းက ညနေစောင်း သူငယ်ချင်းတွေနဲ့ လမ်းလျှောက်ထွက်အလာ မျက်နှာချင်းဆိုင်မှ မိန်းကလေးနှစ်ယောက်ကိုတွေ့လိုက်တယ်တဲ့။ တစ်ယောက်က တော်တော်လေး လှတယ်။ နောက်တစ်ယောက်ကတော့ မလှရုံမက၊ ရုပ်ဆိုးတဲ့ အထဲတောင်ပါတယ်။ ဒါနဲ့ အဖေက တွေးလိုက်တယ်တဲ့၊ ချောလှတဲ့ မိန်းကလေးတွေ လူကြည့်ခံရမယ်။ ယောင်္ကျားလေးတွေရဲ့ “လှတယ်၊ ချောတယ်၊ ချစ်စရာလေး” စသဖြင့် ကော့မန့်အမြဲ အပေးခံရမယ်။ ရုပ်ဆိုးသူလေးတွေခမျာတော့ ယောင်္ကျားလေးတွေအရေးတယူ ကြည့်တာတောင် ခံရမယ်မထင်ဘူး လို့ရယ်ပေါ့။ အဲလိုတွေးလိုက်ပြီး သူဆုံးဖြတ်ချက်တစ်ခု ချလိုက်တယ်။

လမ်းရှောက်လာတဲ့ မိန်းကလေးတွေ သူတို့အနားရောက်လာတော့ သူက ရုပ်ဆိုးတဲ့ ကောင်မလေးကို သေသေချာချာ စိုက်ကြည့်လိုက်တယ်။ ယောင်္ကျားတွေရဲ့ သဘာဝက (လူအများစုရဲ့ သဘာဝအတိုင်း) လှပတဲ့ အရာတွေကို အာရုံရောက်လေ့ရှိပေမယ့် အဲဒီနေ့က ကျွန်မအဖေ သိပ်လှတဲ့ ဆွဲဆောင်မှုရှိတဲ့ မိန်းကလေးကို မကြည့်ဘဲ ရုပ်ဆိုးတဲ့ ကောင်မလေးကို ကြည့်လိုက်တာပေ့ါ။ ကောင်မလေးကလဲ ပြန်ကြည့်တယ်။ အဲဒီအချိန်မှာ အဖေက ရုပ်ဆိုးမလေးကို ပြုံးပြလိုက်တယ်တဲ့။

လူတစ်ယောက်ကို တခဏတာပဲ ဖြစ်ဖြစ် ပျော်အောင် သေးငယ်တဲ့ လုပ်ရပ်လေးတစ်ခုနဲ့ လုပ်နိုင်ခဲ့လို့ ရုပ်ဆိုးမလေး ပျော်တာ၊ မပျော်တာထက် နောက်ရက်တွေအထိ ကျွန်မအဖေကတော့ ပျော်နေမှာကို တွေးမိလိုက်ပါတယ်ရှင်။

(စာကြွင်း)

ဒါပေမယ့် အဖေလက်ထပ်လိုက်သူ ကျွန်မအမေကတော့ ရန်ကုန်တက္ကသိုလ် ဘောဂဗေဒ အဓိက က အလှမယ်တစ်ဦးဖြစ်နေတော့တာပါပဲရှင်။ 

ကြာတော့ကြာခဲ့ပါပြီ။ ကျွန်မငယ်ငယ်က နေခဲ့တဲ့မြို့မှာ မိန်းကလေးတွေ ရှပ်အင်္ကျီပွပွကြီးတွေနဲ့ ထမီကိုဒူးဖုံးရုံ ၀တ်ကြတဲ့ ခေတ်တစ်ခု ပေါ်ခဲ့တယ်။ မိန်းကလေးတွေ သူတို့အဖေတွေ၊ အကိုတွေ၊ မောင်တွေရဲ့ အင်္ကျီတွေယူဝတ်တဲ့ခေတ်ပေါ့၊ ကျွန်မတို့ လမ်းထဲမှာကလဲ တစ်လမ်းလုံးနီးပါး ဆွေမျိုးတွေ စုနေကြတော့ အမတွေ၊ အကိုတွေ၊ မောင်တွေဟာ တော်တော်ရင်းရင်းနှီးနှီး ကိုချစ်ကြတယ်။ ကြီးသူကိုရိုသေ ငယ်သူကိုလေးစားတဲ့ တစ်ချိန်ထဲမှာ သူငယ်ချင်းတွေလိုလဲဖြစ်နေကြတယ်။ စာအုပ်စာတမ်းတွေ၊ ဖတ်စာအုပ်တွေ၊ လက်ဆင့်ကမ်း သုံးကြတယ်။ ဒါပေမယ့် ဟိုလူဒီလူ အင်္ကျီတွေတော့ ယူဝတ်လေ့ မရှိကြဘူး။

တစ်နေ့တော့ ကျွန်မရဲ့ ၀မ်းကွဲအမတစ်ယောက်က ဗြိတိသျှသံရုံးမှာ စာအုပ်သွားငှားမယ် ဆိုပြီး အဖော်လာစပ်တယ်။ ကျွန်မလဲ အ၀တ်အစားလဲပြီး သူ့ အိမ်ကို ချက်ချင်း လိုက်သွားတယ်။ သူ့ အိမ်ရောက်တော့ သူကဘာ စိတ်ကူးပေါက်တယ် မသိဘူး။ သူ့ အကိုရဲ့ ဗီဒိုကိုဖွင့်ပြီး သူ့ စိတ်ထဲမှာ သဘောအကျဆုံး ရှပ်အင်္ကျီတစ်ထည်ကို ကောက်ဝတ်လိုက်တယ်။ ပြီးတော့ မိန်းကလေးတို့ ထုံးစံအတိုင်း နှုတ်ခမ်းနီ ဘာညာဆိုးတယ်။ ပြီးတော့ ညီအမနှစ်ယောက်သား လိုင်းကားစီးပြီး မြို့ထဲကို ထွက်ခဲ့ကြတယ်။

သံရုံးလမ်းဒီဘက်ထိပ်က လမ်းလျှောက်လာကြတုန်း ခပ်လှမ်းလှမ်းမှာ အဲဒီအကိုနဲ့ သူ့ သူငယ်ချင်း တစ်ယောက်ကို တိုက်တိုက်ဆိုင်ဆိုင်ပဲ မျက်နှာချင်းဆိုင်မှာ လျှောက်လာနေတာ တွေ့လိုက်တယ်။ အနားရောက်တော့ အကိုက ညီမလေးတို့ သံရုံးလာတာလားလို့ မေးတယ်။ မျက်လုံးက အမရဲ့အင်္ကျီကို ကြည့်နေတယ်။ မျက်နှာကလဲတစ်မျိုး ဖြစ်နေတယ်။ အကို့သူငယ်ချင်း မျက်နှာကလဲ မချိုမချဉ် ဖြစ်နေတယ်။ အမကတော့ ဘာမှမသိဘူး ထင်တယ်။ နောက်နေ့ကျတော့ အဲဒီအမ သ်ိခဲ့ရတာကတော့ သူဝတ်ထားတဲ့အင်္ကျီက အဲဒီနေ့က အကို့ဘေးမှာရပ်နေတဲ့ အကို့သူငယ်ချင်းရဲ့ အင်္ကျီဆိုတာကိုပေါ့။ ဒါကို သူက ကျွန်မကို တော်တော်ကြာမှ ပြောပြခဲ့တယ်။
သူသာ စောစော ပြောခဲ့ရင် ခုလို မျက်နှာပူစရာ အဖြစ်တစ်ခု ဖြစ်လာခဲ့မှာ မဟုတ်ဘူး။

ဘာဖြစ်လို့လဲဆိုတော့ ကျွန်မက အထက်တန်းကျောင်းသူကြီး မမကို အားကျပြီး လမ်းထဲက ဆရာ တစ်ယောက်အိမ်မှာ ကျုရှင်တက်တဲ့တစ်နေ့။ ဖေဖေ့ရဲ့အင်္ကျီ တစ်ထည်ကို အပေါ်အင်္ကျီ အနေနဲ့ ၀တ်သွား လိုက်တယ်။ထမီကို အရှည်ကြီး ၀တ်ရတာ သိပ်နှစ်သက်တဲ့ ကျွန်မ…. အဲဒီနေ့က ထမီကိုလဲဒူးဖုံးရုံ ၀တ်သွားလိုက်တယ်။ သနပ်ခါးလိမ်းရမှာတောင် စိတ်ညစ်တဲ့ ကျွန်မ အဲဒီနေ့က နှုတ်ခမ်းအနီရောင် ဆိုးသွားလိုက်တယ်။ အမှန်တော့ အဖေ့ရဲ့ အဲဒီအင်္ကျီကို
ဝတ်ချင်နေတာ ကြာပါပြီ။ အင်္ကျီအရောင်ကလဲ ကျွန်မသိပ်ကြိုက်တဲ့ အရောင်၊ နောက်ပြီး ရှေ့မှာလဲ အိတ်တွေ အများကြီးနဲ့။ ရှေ့တင်မက ဘေးက ခါးချုပ်ရိုးပေါ်မှာပါ အိတ်လေးတွေ ရှိတယ်။ ကျူရှင်မှာလဲ ဂစ်တာတီးဖော် သူငယ်ချင်း မိန်းကလေးတွေသာမက၊ (၁)လမ်းထိပ်က ကျွန်မဦးလေး ဖြစ်သူ ဂစ်တာဆရာဦးအောင်ခိုင့်တပည့် သူငယ်ချင်းယောင်္ကျားလေးတွေကပါ သဘောကျပြီး ချီးကျူး နေကြတာပေါ့၊

“နင့်ကုတ်ကအရမ်းမိုက်တာပဲ၊ဘယ်သူ့ကုတ်အင်္ကျီလဲ” ဆိုတော့….
“ငါ့ကုတ်အင်္ကျီပေါ့ဟဲ့”လို့ ဂုဏ်ယူဝင့်ကြွားစွာနဲ့ ပြောလိုက် မိတယ်။
ဒီလိုနဲ့ ည နဲနဲမှောင်လာတဲ့အချိန်မှာ ဆရာကတော်က ကျွန်မကို သမီးအိမ်က လိုက်လာတယ်လို့ စာသင်ခန်းထဲဝင်ပြီး လာပြောတယ်။ နောက်လှည့်ကြည့်လိုက်တော့ ကားမောင်းတဲ့ ဦးကြီးစန်းရဲ့ သမီးလေးက အတန်းရဲ့နောက်မှာ ရောက်နေတယ်။ သူ့လက်ထဲမှာလဲ ကျွန်မရဲ့ အနွေးထည် အပါးလေး တစ်ထည်လဲ ကိုင်ထားတယ်။ ပြီးတော့ အသံစာစာလေးနဲ့ တစ်တန်းလုံး ကြားအောင် ပြောလိုက်တယ်။

“မမ..မမဖေဖေက အရေးတကြီးနဲ့ အပြင်သွားရမှာမို့ သူ့အင်္ကျီ ပြန်ပေးလိုက်ပါ” တဲ့လေ။

<သောင်္ကြာနေ့၊ မေလ ၁၁ရက်၊ ၂၀၀၆>

မိုးရွာပြီးစမို့ နေ၀င်ဖျိုးဖျကောင်းကင်က ကြည်လင်နေသည်။ နီယွန်မီးရောင် ၀ါကျင့်ကျင့် အောက်မှာ မိုးငွေ့တို့ဝေ့၀ဲနေသည်။ ရေစပ်စပ်မြေနီလမ်းပေါ်မှာလဲ မိုးငွေ့တွေ။ အင်္ကျီအိတ်ထဲကို လက်နှစ်ဖက်ထည့်ထားရင်း လမ်းလျှောက်နေတဲ့ နိုး ခြေလှမ်းတွေ အရင်နေ့တွေကထက် လွတ်လပ်ပေါ့ပါးနေသည်။ နှုတ်ခမ်းတွေလဲ ကွေးသည်ဆိုရုံ ပြုံးနေတာကို နိုးကိုယ်နိုး သတိထားလိုက်မိသည်။ ရင်ထဲမှာတော့ လွတ်လပ်ခြင်းရဲ့ အရသာကို သိသိသာသာကြီးခံစားနေရသည်။ ပေါ့ပါးလွတ်လိုက်နေလိုက်တာ ဝေဟင်မှာ အတောင်ဖြန့်ပျံနေတဲ့ ငှက်တစ်ကောင်ထက်တောင် လွတ်လပ်၊ ပျော်ရွှင်၊ ရင်ခုန်နေဦးမည်ထင်သည်။ မိုးရိပ်မိုးငွေ့တွေရှိနေတာတောင်မှ ကောင်းကင်က သည်နေ့မှ ပိုလို့ကြည်လင်နေသလိုလို၊ လေထဲက ဘူးသီးကြော်နဲ့က ပိုလို့ မွှေးပျံ့နေသလိုလို၊ ကားဂိတ်နောက် လက်ဖက်ရည်ဆိုင်ထဲက သီချင်းသံက ပိုလို့သာယာငြိမ့်ညောင်းနေသလိုလို၊
ရှေ့တူရှုကိုတည့်တည့်ကြည့်ရင်း မိုးငွေ့တွေရောယှက်နေတဲ့ ညနေခင်းလေကို နိုး တ၀ကြီးရှုရှိုက်လိုက်သည်။

ခြံထဲလှမ်းဝင်လိုက်တော့ ခံပင်ကခံသီးနီနီလေးတွေပေါ်မှာ မိုးရေပေါက်လေးတွေ တွဲကျနေသည်။ ခပ်မြင့်မြင့်အကိုင်းက အသီးလေးတွေကို ပြေးခုန်လို့ လက်နဲ့ပုတ်လိုက်မိသည်။
“ဘာဖြစ်လာတာလဲ”
ခြံထဲ ရေစပ်စပ်မြက်ခင်းပေါ်က သရက်ကင်းလေးတွေကိုကောက်နေတဲ့ ဒေါ်လေး ကလှမ်းမေးလိုက်သည်။
“ပျော်လို့”
ဆံပင်တွေကိုလက်နဲ့သပ်ရင်း ခပ်မော့မော့လေးပြောပြီး နိုး အိမ်ထဲကိုလှမ်းဝင်တော့ နားမလည်သလို ဒေါ်လေးကကြည့်ရင်းကျန်ရစ်ခဲ့သည်။
(ဆက်ဖတ်ရန်…)

ဒီနေရာမှာ အစစ်အမှန်တွေ ရှိမနေဘူးလို့ ဆိုနိုင်ပါတယ်။
………….

ဒီနေရာမှာ
သာနေတဲ့ “လ”၊ ပြာနေတဲ့ “ရေ”
စိုပြေတဲ့ “လေ”၊ သကာရည်လောင်းတဲ့ “ဆောင်း” နဲ့
အညောင်းမိနေတဲ့ “မေ”
…….

ဒီနေရာမှာ
ဝေဖန်မှုတွေ၊ သုံးသပ်မှုတွေ၊
အပြစ်တင်မှုတွေ၊ မြှောက်ပင့်မှုတွေ၊
မလိုမုန်းထားမှုတွေ၊ အားကျမှုတွေ၊
စိတ်ပျက်မှုတွေ၊ စိတ်ခွန်အားတွေ
အတိတ်တွေ၊ အနာဂတ်တွေ၊
ပစ္စုပန်တွေ၊ တေလေတွေ၊
အသိနက်နက်တွေ၊ နဝေတိမ်တောင်တွေ
စာအုပ်ကြီးသမားတွေ၊ individualist တွေ
Naturalist တွေ၊ Existentialist တွေ
centrist တွေ…
ဘယ်သူမှ မရှိ…
ရှိနေတာက…
“လ” “ရေ” “လေ” “ဆောင်း”
အကြောင်းတွေမသိလို့ အေးချမ်းချင်ိတဲ့ “မေ”
ကိုယ်တစ်ယောက်ထဲ နေပါရစေ။
(ဆက်ဖတ်ရန်…)

ပင်လယ်ကမ်းစပ်က သဲဖြူဖြူမွမွလေးတွေပေါ်မှာ ကလေးလေးတစ်ယောက် သဲအိမ်ကလေး ဆောက်နေတယ်။ ခပ်ဝေးဝေးက အုန်းပင်တန်းတွေကြားထဲကိုတော့ နေရောင်ခြည်တွေက ဖြာကျနေတယ်။ ဆောက်ပြီးခါစ သဲအိမ်ကလေးကိုထားပြီး ကလေးမလေးက ရုတ်တရက်
သောင်စပ်ကနေ အုန်းပင်တန်းတွေဆီကို အားကုန်ပြေးသွားတော့ ပူနွေးတဲ့ သဲပြင်မွမွမှာ ခြေရာသေးသေးလေးတွေကျန်နေခဲ့တယ်။

အုန်းပင်တန်းထဲရောက်တော့ ကလေးမလေးကနေရောင်ခြည်တန်းတွေကို လိုက်လို့ဖမ်းနေတာပေါ့။
အဲဒီအချိန်မှာ မိုးကောင်းကင်ပေါ်က ငှက်မွှေးလေးတစ်ခု ဝေ့၀ိုက်လို့ကျလာတယ်။
ကလေးမလေးကငှက်မွှေးလေးကို ခုန်ဖမ်းလိုက်တယ်။
အဲဒီအချိန်မှာ ဂါဝန်လှလှလေးက လေထီးလေးလိုဝဲပျံသွားတော့တယ်။
ငှက်မွှေးလေးက သူ့ကို ကလူကျီစယ်လို့ ခပ်ဝေးဝေးကို ဝေ့၀ဲဝေးလွင့်သွားတယ်။
ကလေးမလေးက ဝေးလွင့်သွားတဲ့ ငှက်မွှေးလေးကို ၀မ်းပန်းတနည်းငေးကြည့်ရင်း ပင့်သက်ရိူက်လိုက်တယ်။
(ဆက်ဖတ်ရန်…)

ကျေးဇူးပြုလို့ စိတ်ကူးယဉ်ခွင့်လေးတစ်ခု
အခုအချိန်လေးမှာတော့ ရပါရစေ။
ပင်ပန်းလှတဲ့ ဒီလောကကြီးထဲ
အချိန်သတ်မှတ်ချက်တွေနဲ့
ကြွက်တစ်ကောင်လိုပဲ ပြေးလွှားနေရတာ
ငါမောပန်းနေပြီ

ဘာကိုမှ မသိတဲ့လူတစ်ယောက်ဖြစ်နေတော့လဲ
ဘာဖြစ်သွားမှာမို့လို့်လဲ..
တမျိုးကောင်းတာပဲပေါ့…

သွားချင်ပြီ..အချိန်မတန်သေးဘူးလား
ဘယ်တော့များမှ မေ့ကို လာခေါ်မှာလဲ
ဒီကမ္ဘာဟာ… “ယာယီတဲ”ဆို..
ဘုရားသခင်ကို ပြောပေးကြပါ..
အမြန်သာ လာခေါ်ပါတော့လို့..

<၂၃ရက် မတ်လ၊ ၂၀၀ရ>